معاناة أخت النفساء,,,

أنا اليوم عندي لكم سالفة كلها هزائم نفسية وأحزان...واللي عندها مشاكل لاتقرب يكفيها اللي فيها,...

كان يا ما كان في سالف العصر والاوان << كذا تنقال..؟؟

المهم ما علينا ,, كان فيه فتاة رقيقة .. آخر العنقود ممشوقة القوام يفترض أن تكون دلوعة.. في ثالث ثانوي دافورة شاااااااطرة وحريصة على الدرجات..

ولكن الزمن لا يرحم كما يقال.. فوقها أربع بنات متزوجات..!

والأخوات السالف ذكرهن ما صدقن يعرسن إلا ما شاء الله سباق الهجن في الحمل والولادة وكله على راس الضعيفة هذي..

أما هالمرة زودوها حبتين ..ثلاث منهن حملن وولدن في فترات متقاربة يعني أم النذالة !! لو أنهن ولدن في وقت واحد
كان الخدمة مرة وحدة ونخلص بس المشكلة كل وحدة تنتظر الين تخلص اللي قبلها من النفاس ثمين تولد..

والمسكينه المذكورة أعلاه مشتغلة صبابة وخدامة ومربية ومونسة مجانا.. وهذا السيناريو يتكرر في كل ولادة,,:


تطلع الوحدة منهم من المستشفى((أجل من وين )) ومعها الأم شايلة الطفلة الصغيرة ملفوفة تقول ورق عنب << مشتهيه الأخت
تدخل البيت ومسوية نفسها تعبانة..
وطبعا الأخت الضعيفة لازم تكون مرتبة البيت ومنزلة السرير ومرتبته.. ومجهزه الغدا شامل المطازيز (وفي رواية القبوط) بالحلبة..
ولازم تكون الابتسامة شاقة عرض وجهها ولازم تستقبل الطفلة (( حتى الاطفال نستقبلهم والله عشنا)) وتثني على برائتها وجمالها الفتان ...

ولازم تتقمص شخصية الخدامة وتجلس في غرفة الوالدة عشان اذا طلبت شي تنفذه(( التغيير للبيبي، جيبي المناديل والموية، ردي على التلفون....إلخ..))
وفي العصر.. لازم تكون كاشخة ومتزينة عشان اذا جوا الضيوف تستقبلهم ، وهنا تتقمص دور الصبابة يعني لازم تكون عيونها مثل النسر عشان تشوف الفناجيل ومستوى القهوه اللي فيها.. ولازم يكون عندها رقبة البومه عشان تتلفت في جميع الاتجاهات..
ويكون عندها يدين أخطبوط عشان تصب القهاوي وتوزع الحلى وتصب العصيرات وتقرب الطاولة في نفس اللحظة ..
أخيرا لازم يكون عنها أذن ثعلب عشان تسمع صياح ورقة العنب الملفوفة في الغرفة الثانية..

*** تقولين مجموعه مولينيكس***

ولازم تسوي الاشغال هذي بنفس طيبة عشان ما تزعل النفساء...


وفي الليل وما ادراك ما الليل,,..؟؟


تنام معاهاعشان تساعدها اذا محتاجة شي وطبعا صايرة هي النفساء كل ما صاحت النونو تقوم من فراشها عشان تعطيها أمها((والله المشوار )) وفي الصباح على المدرسة مباشرة لتستلم الأم الشرنقة حتى عودة الـ...... وهكذا طوال الأربعين ...

وبعد الأربعين,,,,.... .....


أتمنى أن السالفة أعجبتكم ,,, منقولة من مجلة حياة.. بتصرف..